Buscar
04:40h. Domingo, 23 de Septiembre de 2018

Nota de prensa | Orzamentos Xerais do Estado

O BNG valora como electoralista a proposta orzamentaria do Goberno para A Coruña

Desde o BNG entendemos que a proposta de investimentos para A Coruña que se recolle nos orzamentos xerais do Estado están realizados desde unha perspectiva moi electoralista.

Vista aérea do porto exterior Punta Langosteira (imagen de ecocosas.com)
Vista aérea do porto exterior Punta Langosteira (imagen de ecocosas.com)

Neste sentido, o Partido Popular recupera partidas que noutros anos se tiñan proposto para a Coruña pero que nunca chegaron a executarse, ou mesmo, con todo descaro, coloca “no haber” investimentos, como o da Ría do Burgo que nunca se dan executado e que, por tanto, xa mesmo certificamos que tampouco se van a executar para este 2018. Estas partidas, ademais, só poden ser cualificadas como “investimentos pantasma”, xa que logo aparecen e desaparecen en función do momento político, e neste caso, só se entende desde a perspectiva asumida polo PP que cre xa que estamos no período preelectoral das municipais de 2019.

Asemade, debemos lembrar a paulatina redución e mingua dos últimos anos, que tivo no ano pasado un récord mínimo de investimentos para a nosa cidade, polo que as partidas destinadas para este ano non se correspondan coas verdadeiras necesidades da cidade, significando un intento obsceno de enganar as coruñesas e coruñeses.

Deste xeito parécenos insuficientes as partidas para Punta Langosteira, por exemplo, xa que logo vimos defendendo desde hai anos que o Porto Exterior se debe financiar en base aos orzamentos xerais do Estado e cremos que non se poñen en riba da mesa os investimentos necesarios para isto, repartíndose só migallas.