EntreNós

Imprimir

Medra a oposición á universidade privada

Redacción | 11 de febrero de 2020

Protesta no campus de Elviña este martes. Fotos BNG Coruña
Protesta no campus de Elviña este martes. Fotos BNG Coruña
Convocadas pola Plataforma en defensa da Universidade pública, esta mañá as cidades galegas acolleron mobilizacións en contra da privatización do ensino superior coa que ameazan o PP e Abanca. 
 

“Freemos o avance privatizador”, proclamaban as redes sociais do Grupo Común da Esquerda. Na mobilización celebrada hoxe na Praza do Obradoiro, en Compostela, o deputado do BNG, Xosé Luís Rivas afirmou que a universidade debe estar “ao servizo da sociedade como elemento dinamizador e de cambio social”. Para o nacionalista, o apoio de Feijoo e o Partido Popular á universidade privada de Abanca representa “un duro ataque ao sistema universitario galego” e hai que parar un proxecto, dixo que pon en grave risco a nosa universidade pública. 

Na Coruña, a concentración celebrouse ás portas da Facultade de Informática no campo de Elviña. Como no resto das cidades, a protesta foi secundada por profesores e traballadores da universidade, organizacións estudantís e sindicais e partidos políticos de esquerda. 

Os tres reitores das universidades galegas defenderon as demandas da plataforma. Julio Abalde (UDC), Antonio López (USC) e Manuel Reigosa (UVigo) emitiron un comunicado conxunto para trasladar o seu apoio ás protestas en todos os campus do país e advertiron que “diante da iniciativa privada, cremos que os esforzos dos cidadáns a través dos seus impostos deberían ir dirixidos a fortalecer o actual sistema universitario público".

Puede ver este artículo en la siguitente dirección /articulo/actualidade-coruna/estendese-protesta-universidade-privada/20200211144528009055.html


© 2020 EntreNós