EntreNós :: Últimos álbums - Xentes da Agra

Escritura e vida na praza do mundo. As Conchiñas, xullo de 2017

Fri, 21 Jul 2017 02:00:00 +0200

Eu quixen escribir a miña historia, ese foi un dos textos que se leron onte (leuno Sofía, senegalega de boa fe) que arranca cunha cita de Chinua Achebe, o autor de Todo se esfarela. "Ata que os leóns non cren o seu propio historiador, a historia da caza só glorificará ao cazador", di Achebe. Foi na presentación de Ser Modou Modou, o libro no que o senegalego Cheikh Fayé conta a vida desde a praza do mundo, desde o barrio da Agra no que leva vivindo desde que chegou á Coruña. E faino en galego. Por que?, preguntáronlle onte unhas inmigrantes coma el. Porque para entender un pobo, para integrarse e querelo, dixo, hai que facelo na súa lingua. Unha proba de agradecemento de Cheikh a este barrio, a esta praza das Conchiñas onde o futuro deste pais xa se debuxa cada tarde. Onte foi unha especial. Os leóns senegalegos descubriron unha voz.

A Agra bule con dous días de folc e foliada

Tue, 13 Jun 2017 01:30:00 +0200

Foron dous días de música en vivo, música popular galega e moita festa nas Cunchiñas e arredores. A FoliAgra comezou con calor intenso e un roteiro de gaitas e pandeiretas o sábado pola mañá, e rematou fresquiña o domingo. Houbo xente, bailaríns e intención de mellorar o ano que vén. Despois de tres edicións en constante crecemento, a FoliAgra consolídase como a gran festa do barrio.

Capoeira nas Conchiñas

Sat, 3 Jun 2017 16:00:00 +0200

Os sábados, nas Conchiñas, son unha sorpresa seguida. A semana pasada foi Donaire que animou a mañá con gaitas e bombos. Esta mañá foron un grupo de capoeira, músicos e danzantes, os que fixeron atronar o día e espertar as gañas de festa. En menos dunha semana, a FoliAgra repicará en todo o barrio. Xuño é mes da música no barrio.

Ferrados que se consolidan na Agra

Mon, 29 May 2017 02:00:00 +0200

Pasou o día, mais non a romaría. As Letras teñen data fixa: o 17 de maio; os ferrados, variables como son, celébranse despois da festa nacional. No Centro Ágora, gracias a Asociación veciñal do Agra, a cita leva camino de consolidarse, inda moza. Habelas Hainas e Os Viqueiras puxeron a nota profesional desta volta. No 2018, cando cadre, máis e mellor, prometen os organizadores.

Luz Pozo non é unha antinomia: poesía no soto

Fri, 5 May 2017 02:00:00 +0200

O soto é a parte do edificio que se sitúa por baixo do nivel exterior do chan, entre os alicerces. Alí, nos cimentos, no local das veciñas da Agra que adoran a lingua, os versos de Luz Pozo iluminaron a tarde escura. Foi onte, nunha homenaxe a matriarca das poetas galegas que vai camiño dos 95 anos sen perder un ápice de brillo na mirada e na escrita.

Danzas do mundo na praza do mundo

Mon, 1 May 2017 10:59:35 +0200

Organizada polo colectivo Diversos dentro das iniciativas Cultura de Barrio, o sábado celebrouse na praza das Conchiñas unha nova xornada de Agra d'Arte. Esta vez, o programa xirou en torno á celebración do Día da Danza. Pola mañá, con bo sol, houbo actuacións de grupos e danzantes que trouxeron até o barrio mostras de folclore de todo o mundo.