Mundo Sen Guerras e Sen Violencia convoca concentración contra a guerra en Ucrania
Cartaz concentración 2023 03 03-01
A Coruña, 28 de febreiro de 2023.- Queremos expresar a nosa profunda preocupación polo aumento da violencia e a escalada do conflito armado en Ucraína. Como seres humanos, cremos firmemente que a guerra nunca pode ser unha solución aos conflitos. Non hai nada que xustifique a supresión de vidas humanas.
Como xa propuxemos na II Marcha Mundial pola Paz e a Noviolencia, promovemos a Nonviolencia Activa para que se converta na verdadeira forza transformadora do mundo, para pasar da cultura de imposición, a violencia e a guerra á cultura de paz, diálogo e solidariedade en cada localidade, país e rexión.
Este conflito ademais, ponnos ao bordo dunha guerra nuclear, cuxas consecuencias serían devastadoras para toda a humanidade. Insistimos en que España debe ratificar o Tratado de Prohibición de Armas Nucleares, que elimine a posibilidade de catástrofe planetaria e libere recursos para resolver necesidades básicas da humanidade.
Pedimos a todos os gobernos que non apoien esta guerra nin cun euro, un soldado ou un fusil, porque esta elección só serve para facela máis sanguenta, máis longa, con máis mortos e máis sufrimento. Pedimos que non se adopten sancións destinadas a empeorar a vida das poboacións en calquera latitude do planeta.
