BNG | nota de prensa

O BNG propón nunha moción que o goberno local desenvolva un plan de rehabilitación integral do barrio das Flores en diálogo coa veciñanza

A mellora global da accesibilidade, do pavimento e da limpeza, a dotación de novos equipamentos públicos (entre eles, un Centro Cívico e unha pista polideportiva) e o calmado do tráfico, entre as propostas da formación nacionalista

O BNG propón nunha moción que o goberno local desenvolva un plan de rehabilitación integral do barrio das Flores en diálogo coa veciñanza
BNG Barrio das Flores int
BNG con veciños do Barrio das Flores (imaxe de https://cidadedacorunha.bng.gal/)

A Coruña, a 6 de abril de 2021. O portavoz do BNG en María Pita, Francisco Jorquera, vai defender no Pleno do próximo 8A unha moción por medio do cal insta o Goberno Local a que desenvolva un Plan de Rehabilitación Integral do Barrio das Flores en diálogo coa veciñanza.

As propostas que fai o BNG nesta iniciativa son produto do recente contacto tido por Francisco Jorquera con veciñas e veciños do barrio, “un dos máis singulares da cidade e con maior conciencia de seu”, remarca o voceiro nacionalista.

“O Barrio das Flores precisa dun plan de rehabilitación integral que recupere e poña en valor este barrio emblemático”, subliña Jorquera. A iniciativa do BNG coloca como obxectivos do Plan de Rehabilitación Integral a mellora global da accesibilidade, do pavimento e dos labores de limpeza, a dotación de novos equipamentos públicos (entre eles un Centro Cívico e unha pista polideportiva) e a adopción de medidas para calmar o tráfico e incrementar a seguranza dos peóns na estrada AC-10, da que é titular o Ministerio de Transportes, Mobilidade e Axenda Urbana.

O BNG coñece que o Concello acaba de contratar unha asistencia técnica para redactar un Plan Director para a rehabilitación deste barrio. “Parécenos unha boa noticia, mais o que fai falta agora é que os contidos dese plan sexan falados e debatidos coa veciñanza, que é a que coñece de primeira man os problemas e carencias” desta populosa zona da cidade, na que moran por volta de 4.000 habitantes.

“En todo caso, mentres non se elaborar e materializar ese Plan, o Concello pode perfectamente adoptar xa medidas que contribúan a mellorar a calidade de vida das e dos veciños”, argúe Jorquera, quen agarda recibir o apoio do conxunto da Corporación para o Pleno lle dar luz verde a esta moción.

Comentarios
O BNG propón nunha moción que o goberno local desenvolva un plan de rehabilitación integral do barrio das Flores en diálogo coa veciñanza