Marea Atlántica | nota de prensa

A Marea Atlántica preguntará ao goberno municipal como está a axudar á veciñanza na solicitude do Ingreso Mínimo Vital

Desde a proximidade, os Concellos teñen que dar un paso adiante e implicarse para que máis persoas teñan acceso ao mínimo para unha vida digna

A Marea Atlántica preguntará ao goberno municipal como está a axudar á veciñanza na solicitude do Ingreso Mínimo Vital
Pleno extraordinario de 30 de julio. Imaxe de Marea Atlántica
Pleno extraordinario de 30 de julio. Imaxe de Marea Atlántica
25 de agosto de 2020.- O grupo municipal da Marea Atlántica rexistrou unha batería de preguntas de resposta escrita para o vindeiro Pleno, interesándose polos recursos que o Concello da Coruña destina para axudar á veciñanza na tramitación do Ingreso Mínimo Vital na cidade.

Deste xeito, solicitamos coñecer como se está a apoiar a tramitación do IMV deste os Servizos Sociais municipais, cantas persoas solicitaron a prestación a través destes Servizos Socias e de que maneira se reforzou o departamento para atender esta demanda.

Finalmente, preguntaremos se o goberno municipal habilitou algún espazo para axudar na solicitude a aquelas persoas que carecen de ordenador ou de acceso ao mesmo.

Estes servizos xa se están a prestar en concellos como Sada ou Pontevedra, e formaban parte da moción que a Marea Atlántica levou ao Pleno do 2 de xullo, solicitando a creación dunha oficina municipal para informar á veciñanza e axudala na tramitación do IMV. Porén, esta proposta foi rexeitada mediante unha emenda asinada por PP e PSOE.

A solicitude do Ingreso Mínimo Vital é complexa, e o Estado está a ter recoñecidos problemas para tramitala en tempo breve. Nestes momentos de crise económica, social e sanitaria, os Concellos teñen que actuar e, como administración máis próxima, poñer os seus recursos ao servizo da cidadanía. A Coruña, como fixo no mandato anterior, debería dar exemplo e axudar a que máis persoas teñan o mínimo para unha vida digna.

Comentarios
A Marea Atlántica preguntará ao goberno municipal como está a axudar á veciñanza na solicitude do Ingreso Mínimo Vital