Eleccións municipais

Jorquera, candidato do BNG á alcaldía en 2023: “A nosa vocación non é estar nun goberno liderado por outra forza política. A nosa vocación é liderar politicamente esta cidade”

“O alcalde Paco Jorquera non será nin delegado da Xunta nin delegado do Estado en María Pita. Será un alcalde coas mans libres”, avanza Ana Pontón

Jorquera, candidato do BNG á alcaldía en 2023: “A nosa vocación non é estar nun goberno liderado por outra forza política. A nosa vocación é liderar politicamente esta cidade”
Presentación candidatura de Jorquera
Presentación candidatura de Jorquera

A Coruña, a 16 de setembro de 2022. Francisco Jorquera vai ser o candidato do BNG á Alcaldía da Coruña en 2023. Así o decidiu a Asemblea Local da formación nacionalista o pasado mércores, nunha sesión plenaria realizada no salón de actos da Fundación Luís Seoane. Jorquera obtivo o apoio unánime das e dos militantes do Bloque que participaron na asemblea.

“A nosa vocación non é ser concelleiros e concelleiras dun goberno liderado por outra forza política. A nosa vocación é ser alternativa. Liderar politicamente esta cidade”, dixo esta mañá Francisco Jorquera nun acto público de presentación da súa candidatura e no que, baixo o lema de Impulsa A Coruña, estivo acompañado pola portavoz nacional do BNG, Ana Pontón. Unha nutrida representación do tecido social e veciñal da Coruña asistiu ao evento, no que tamén estiveron presentes o responsábel local da formación nacionalista, David Soto, a concelleira Avia Veira e a parlamentar Mercedes Queixas.

“Sabemos que é un reto ambicioso. Mais A Coruña necesita impulso e ambición”, remarcou Jorquera, quen esclareceu que se o BNG presenta candidatura á Alcaldía “é porque non aceptamos o rol de actor secundario que o PP e o PSOE queren asignarnos”. “Que perdan toda esperanza”, engadiu.

A ambición coa que o BNG afronta o reto das municipais de 2023 é a mesma coa que a formación nacionalista coloca como obxectivo liderar o goberno galego nas próximas eleccións autonómicas. “Hoxe temos connosco Ana Pontón. Asumiu o liderado do BNG nun momento moi difícil. A Ana Pontón, como moito, asignábanlle o papel de outsider e hoxe moi poucos dubidan que vaia ser a próxima presidenta da Xunta”, afirmou.

Para Jorquera, ser candidato á Alcaldía é “unha honra”, despois de ter “intentado defender con dignidade os intereses de Galiza, e tamén da Coruña, no Parlamento español e no galego”. “Desde hai tres anos teño a oportunidade de traballar en primeira liña pola miña cidade. A cidade na que vivo desde os 9 anos e onde naceron a miña muller e os meus fillos. E creo que estes tres anos serviron para estar mellor preparado para asumir un novo reto”, subliñou.

O BNG é, enfatizou, a “forza emerxente” na Coruña, “a forza política con máis expectativas de crecemento”, de aí que “asumamos este reto coa convicción de que, co liderado do BNG, A Coruña vai ter o impulso que necesita”.

E é que, razoou, “na Coruña existe a percepción de que á cidade lle falta impulso”, entre outras razóns porque “non existe un proxecto claro que marque un horizonte cara ao que avanzar”.

E se ben é certo que un proxecto de cidade non se dá plasmado en apenas tres anos, non o é menos que “pouco proxecto pode haber cando unha cuestión chave para o futuro da Coruña como o cumprimento dos obxectivos da Axenda 2030 é tramitada polo Goberno Local de forma improvisada, precipitada e trapalleira”.

“E pouco proxecto de cidade pode haber”, acrecentou, “cando non se é capaz de resolver os problemas do día a día. Xa sexa a limpeza, a vivenda, o estado de rúas e beirarrúas ou as melloras nas liñas de buses”.

E ante a falta de proxecto do actual Goberno Local, o BNG chama “a todas a coruñesas e coruñeses a impulsar A Coruña e a facelo con nós”. Impulsar A Coruña para construír unha cidade para vivir e traballar, ben tamén como para articular a comarca da Coruña como unha realidade metropolitana. Impulsar unha cidade á medida das persoas seguindo os principios de experiencias exitosas levadas a cabo por gobernos municipais do BNG e que hoxe son mesmo un referente mundial. Impulsar outro modelo de mobilidade –as persoas e o transporte colectivo primeiro, os vehículos particulares despois- e darlle pulo tamén ao enorme potencial que temos no eido da cultura.

O impulso tamén haillo que dar ás políticas de medio-ambiente –para que realmente se faga reciclaxe-, vivenda –para que o acceso a moradas dignas non sexa un imposíbel para miles de persoas- e servizos sociais –para combater as crecentes desigualdades.

“E impulsar tamén A Coruña para termos un Goberno Local esixente coas outras administracións”, recapitulou Jorquera, “por exemplo cando se trate de defender o noso porto ou de reclamar que nos devolvan edificios e terreos que son nosos, en vez de especular ou de facer caixa con eles.

Comeza hoxe, coa presentación do candidato á Alcaldía, un camiño que continuará coa elaboración do resto da lista do BNG ás municipais de 2023. “Unha candidatura”, avanzou, “que terá un marcado perfil social, aberta a todos os que compartan o noso proxecto para A Coruña”. “Unha candidatura que será espello do que é esta cidade. Do que é e do que aspira a ser”, remarcou.

E á vez que se conforma a equipa se irá elaborando tamén “o noso programa electoral, que faremos en diálogo coa sociedade”. Para impulsar A Coruña, precisou, o BNG ten dous avais: “O aval do bon labor dos gobernos municipais do BNG e o aval do traballo do BNG no Concello durante estes tres anos, en que achegamos proxecto, solidez, solvencia e capacidade de diálogo, alén de sermos unha forza política estábel e confiábel”.

E, xa a modo de coda, remarcou: “Non estamos aquí para cubrir o expediente. Estamos aquí para ofrecerlle á Coruña unha alternativa, un horizonte. Asumindo o liderado desta cidade”.

Presentación candidatura de Jorquera 2
Presentación candidatura de Jorquera 2

“Jorquera é alguén que sabes que non che vai fallar”

Jorquera é “alguén que sempre está aí, accesíbel e aberto a toda a veciñanza, alguén que sabes que non che vai fallar”, dixo na súa intervención Ana Pontón, a portavoz nacional do BNG. “É o alcalde que precisa A Coruña para situar esta cidade á vangarda de Galiza e recuperar o pulso perdido”, engadiu.

“Vangarda de Galiza no urbanismo, nunha mobilidade sustentábel, no acceso á vivenda, na defensa dos servizos públicos de calidade, punta de lanza na promoción da economía produtiva e do emprego de calidade. Vangarda na ciencia e na innovación, no ámbito cultural e artístico”, remarcou.

Pontón puxo a énfase en que Jorquera será “un alcalde coas mans libres para defender A Coruña ante o Goberno da Xutna e ante o Goberno do Estado”. “Non será nin o delegado dun nin o delegado doutro en María Pita”, argüíu.

E iso significa que as coruñesas e os coruñeses “poden ter a total certeza de que o Paco Jorquera alcalde non tolerará a discriminación que supón que o Estado condone a débeda do porto de Valencia, mentres fai pagar á veciñanza polo Porto da Coruña”, clamou Pontón. “Nin tampouco permitirá que o Estado pretenda traspasar ao Concello o antigo cárcere sen garantir a rehabilitación plena dun edificio que hoxe é pura ruína por culpa dese mesmo Estado”, acrecentou.

Na mesma liña, completou: “O Paco Jorquera alcalde non permitirá que o Goberno do PP volva apostar polo cemento na ampliación do CHUAC, mentres ignora o colapso nos centros de atención primaria da cidade, corazón do sistema sanitario. Nin baixará a cabeza sumisamente ante proxectos urbanísticos que agreden o litoral (como o das Percebeiras)”.

Ten claro a líder do BNG de que Jorquera é o alcalde que A Coruña precisa. “E ten razón cando afirma que o BNG non naceu nesta cidade hai 40 anos para ser un actor secundario. Naceu para conseguir unha Coruña mellor para todos os veciños e veciñas, naceu para conseguir unha Galiza mellor”, aseverou.

O reto de Jorquera, esclareceu xa para concluír, é “traballar a favor dunha Coruña máis próspera e con futuro, con benestar social e servizos públicos fortes, unha cidade na que vivir e traballar. Unha Coruña que sexa protagonista da Galiza que desexamos e que merecemos”.

Jorquera, candidato do BNG á alcaldía en 2023: “A nosa vocación non é estar nun goberno liderado por outra forza política. A nosa vocación é liderar politicamente esta cidade”