Para celebrar este aniversario, A Coruña acolle dúas visitas guiadas para dar a coñecer á poboación as marcas da represión lingüística na cidade, de acordo cos datos extraídos desta investigación.

Os roteiros sairán neste domingo, 11 de xuño, ás 11h30 e ás 18h30 en fronte da igrexa das Capuchinhas, na rúa Panadeiras, por ser o primeiro templo de toda a Galiza en ter misa continuada en galego, pero con problemas, como a presenza persistente da policía secreta camuflada entre os fieis ou a negativa do goberno a permitir que esa misa puidera ser retransmitida pola radio. A participación nos roteiros é aberta e de balde, pero é necesario inscribirse previamente no correo [email protected].

"O libro negro da lingua galega" tivo unha recepción "excelente" desde a súa publicación, incluso "inesperadamente boa para un traballo de case 800 páxinas e que pesa un quilo e cen gramos", como lembra o autor cun sorriso. "Eu creo que esta acollida non se pode explicar sen a propia situación do galego, que fai máis necesario un estudo como este, pois responde con datos contundentes a toda a propaganda que nos atribúen", indica Callón. Ademais, a través destas páxinas, "a longa lista de castigos, imposicións, queimas e barreiras ao longo dos séculos mostra que o Estado español ten unha débeda histórica co galego, e esa débeda debe saldarse".

Doce meses despois, o volume xa está na súa cuarta edición e foi motivo de 45 actos de presentación en diferentes lugares da xeografía galega e máis aló: Bruxelas, Lisboa, Madrid, Río de Xaneiro, Salvador da Bahía e Niterói acolleron encontros para falar sobre as súas páxinas. Ata agora, 2.771 persoas participaron nestes lanzamentos.

Ademais das visitas guiadas en A Coruña o día 11 de xuño, neste fin de semana realizaranse encontros polo mesmo motivo en Santiago de Compostela e en Boiro. Estes eventos, promovidos pola Deputación da Coruña, contan co apoio da Asociación Cultural O Galo, da Agrupación Cultural Alexandre Bóveda, da libraría de Rosa, da libraría Pedreira, das Edicións Xerais e da Mesa pola Normalización Lingüística.