A única titulación que debe ser admitida nun proceso selectivo de “Educador/a Social” é a de Educación Social (diplomatura ou grao), e seguirémolo  reivindicando por todos os nosos medios ante a Dirección Xeral de Función  Pública e as organizacións sindicais para esta e as vindeiras ofertas de emprego  público e sucesivas convocatorias. 

• A aceptación doutras titulacións distintas de educación social nesta nova  convocatoria é un agravio e discriminación para as educadoras/es sociais, así  como un factor que incide na calidade dos servizos socioeducativos. 
• A creación do título de Educación Social xurdiu ante a necesidade de formación  universitaria especializada á que non daba resposta ningunha titulación das  existentes con anterioridade. 
• A admisión doutras titulacións nos procesos de estabilización e funcionarización  podía ser xustificable para non afectar ás persoas que, sen ter a titulación de  Educación Social, estaban ocupando os postos interinamente ou como persoal  laboral, neste momento e de cara a novasconvocatorias xa non é admisible. 
• A Xunta de Galicia debería dar exemplo na defensa do dereito da cidadanía a  recibir unha atención especializada, así como na defensa dos dereitos das persoas  que investiron esforzo, tempo e cartos nunha formación universitaria oficial,  recoñecida pola Administración Pública. 
• A actual Lei de Emprego Público de Galicia non recoñece o que vimos  reclamando máis o cambio sería posible se houbese unha vontade política real,  pois tamén está na súa man modificar as mesmas normas que promulgaron.

Debemos facer fincapé no caso omiso feito polos sindicatos á hora de defender e tomar  en conta as nosas alegacións nos diferentes borradores desta convocatoria. 

Levamos anos reivindicando o recoñecemento da nosa figura profesional, tanto na  administración, dentro da Relación de Postos de Traballo (RPT), e tamén a nivel privado.  Neste longo camiño fomos acadando pequenos logros (a creación dunha especialidade  coa denominación de “Educador/a Social” xa é unha realidade) pero aínda queda moito  por percorrer. 

Neste momento o Colexio de Educadoras e Educadores Sociais de Galicia estuda as  posibles accións a desenvolver ante esta inxustiza para tratar de revertila e impedir que  volva a suceder. 

Somos profesionais comprometidas e comprometidos loitando pola reivindicación da  nosa figura, xa que a cidadanía ten o dereito de contar con educadoras e educadores  sociais nos diferentes servizos e programas para ter as súas necesidades cubertas, recibir  apoio e ter unha mellor calidade de vida e benestar social. 

Convidamos a que as persoas educadoras sociais a través da colexiación e o estudantado contactedes para mantervos informadas das distintas accións que iremos levando a cabo. 

Educadoras e Educadores Sociais de Galicia, necesitamos estar todas e todos unidas e  unidos para asegurar o dereito da cidadanía a acceder dende as entidades públicas a  profesionais adecuadamente formadas nas distintas universidades galegas no Grao  universitario de Educación Social.