Os Mallos
O BNG traslada ao Goberno Local as preocupacións dos veciños dos Mallos
![Reunión Mercedes Queixas veciñanza dos Mallos](/asset/thumbnail,992,558,center,center/media/entrenosagra/images/2023/11/28/2023112813100790129.jpg)
A Coruña, 28 de novembro de 2023 - Froito do encontro, a edil nacionalista diríxelle un feixe de preguntas por escrito ao Goberno Local sobre distintos aspectos que atinxen as competencias do Concello, desde a mobilidade até a limpeza.
“En xeral existe unha percepción moi estendida de que o Goberno Local trata peor os barrios populares que o centro da cidade”, resalta Mercedes Queixas, quen refire problemas como a invasión da zona peonil da Rúa Ramón Cabanillas por parte de vehículos particulares ou a falta dun mantemento adecuado do Parque Infantil da Sardiñeira, asunto que o BNG xa levou ao Pleno no mandato anterior (decembro de 2022) a medio dun rogo oral.
Queixas entende que o Executivo coruñés debe atender peticións veciñais tan razoábeis como a instalación dunha marquesiña de autobús na parada 253 dos Mallos ou a habilitación dun espazo de uso comunitario (TEU), “como o que existe nalgún outro barrio da cidade”.