A ONG VIRAVENTOS ORGANIZA UNHA MOSTRA A PROL DA ACOLLIDA E OS DEREITOS DAS PERSOAS MIGRANTES, CON PARTICIPACIÓN DE PERSONAXES DA CULTURA GALEGA

“Galegas coma ti”, unha exposición para a convivencia intercultural

Viraventos leva ás rúas da Coruña unha exposición contra a discriminación racial para promover na sociedade galega una actitude de acollida e respecto pola diversidade, fundamentada na comprensión do fenómeno migratorio. A ONG quere divulgar a idea de que a tolerancia e a defensa dos dereitos que asisten a todas as persoas son consustanciais á democracia e requiren os maiores esforzos da sociedade. Para as responsábeis da entidade “a inmigración xa non pode considerarse como un fenómeno temporal. Os fillos e fillas das persoas inmigrantes xa non son inmigrantes: son unha nova xeración de galegos e galegas que manteñen aspectos culturais comúns e outros diferenciados, que deben poder exercer con total liberdade”.

“Galegas coma ti”, unha exposición para a convivencia intercultural
Galegas
Galegas coma tí

Nos meses de marzo e abril instalaranse en prazas céntricas da Coruña e outros concellos da provincia uns módulos expositivos que combinan textos sobre a igualdade de dereitos das persoas migrantes con fotografías nas que aparecen inmigrantes xunto a persoas galegas de relevancia pública no ámbito cultural. Na mostra “Galegas coma ti”, organizada co apoio da Deputación da Coruña e Gadis, con fotografías de Xurxo Lobato e deseño de Xosé Díaz, participan o escritor Manolo Rivas; o presentador da TVG Xosé Ramón Gayoso; a gaiteira Susana Seivane; as actrices Isabel Risco e Lucía Regueiro; a xornalista Fernanda Tabarés; o cineasta e cantante Antón Reixa; e o presidente do Deportivo, Tino Fernández. Senegal, Rumanía, Marrocos, Cuba e Bolivia son os paises de procedencia da poboación inmigrante representada.

Viraventos naceu en 2007 para dar acollida e orientación aos colectivos inmigrantes chegados a Galicia porque, afirman: “cremos na igualdade entre persoas e culturas. Tras case dez anos de experiencia queremos consolidar proxectos de convivencia e intercambio cultural entre galegos e galegas de aqui e de acolá, para axudar a construír o futuro dun País enriquecido pola súa diversidade”.

Itinerario da exposición:

  • 12 a 19 de marzo. Praza de Lugo. A Coruña
  • 19 a 23 de marzo. Praza das Conchiñas. A Coruña
  • 23 de marzo a 4 de abril. Praza Esther Pita. Santa Cruz. Oleiros
  • 4 a 13 de abril. Praza Manuel Murguía. Milladoiro (Ames)
Comentarios
“Galegas coma ti”, unha exposición para a convivencia intercultural