Santiago de Compostela, 26 de setembro do 2023 - Esta iniciativa reuniu grupos de todas as idades e tamaños, incluíndo nenas, nenos e adultos. Os voluntarios traballaron en ríos grandes e pequenos, compartindo o obxectivo común de coidar os nosos ríos e concienciar a sociedade sobre a importancia de mantelos ben conservados.

O pasado domingo, 24 de setembro de 2023, a XVI Limpeza Simultánea de Ríos levouse a cabo en 52 concellos de Galiza grazas á colaboración de 68 entidades diferentes, como asociacións ecoloxistas, culturais, fundacións, centros de ensino e concellos. Nalgúns casos, varias asociacións uníronse para limpar diferentes ríos no mesmo concello, un exemplo desto son Gondomar, Verín, Tomiño ou Santiago de Compostela.

A pesar dos avances conseguidos nos últimos anos na redución de lixo nos ríos apadriñados por estas entidades, en 2023 aínda apareceron numerosos residuos, incluíndo rodas de automóbiles e obxectos voluminosos. Entre os materiais recollidos destacan plásticos, botellas, garrafas, bolsas, sacos, rodas, cristais, latas, pilas, restos de madeira, mobles, ferralla, sinais de tráfico, entullos, tixolas, deshumificadores, uralitas, roupa, calzado e máscaras.

O obxectivo principal do voluntariado ambiental non é simplemente a recollida de residuos, senón concienciar á sociedade sobre a necesidade de protexer os nosos ríos e denunciar a súa situación actual. O Proxecto Ríos, promovido por ADEGA dende 2005 e financiado por Augas de Galicia e a Confederación Hidrográfica Miño-Sil, continúa traballando para a mellora do estado dos ríos galegos.

Para consultar os resultados detallados desta xornada de limpeza, pódese visitar a seguinte ligazón: https://limpeza.proxectorios.org/participantes-2023/.