Noia, 28 de setembro de 2023-. Esta mañá, a Plataforma comarcal contra as verteduras das Minas de San Finx organizou unha concentración ante os Xulgados de Noia. O obxectivo era mostrar a súa repulsa ante as denuncias falsas presentadas pola empresa mineira contra Ecoloxistas en Acción. Estas denuncias forman parte dunha campaña de acoso xudicial que pretende silenciar as protestas.

Durante a concentración, o director facultativo da mina, Iván Losada, estaba chamado a comparecer ante os Xulgados para ratificar a denuncia presentada por Tungsten San Finx. A denuncia está relacionada cun acto simbólico realizado o pasado 5 de xullo no que se taponou durante breves instantes o tubo a través do que a empresa realiza vertidos ilegais.

Os portavoces da Plataforma, Joám Evans e Rogelio Santos, tamén cargaron contra a Xunta demandando que paralice o bombeo de case mil millóns de litros de augas contaminadas con metais pesados que irían a parar á ría de Muros e Noia.

Para Ecoloxistas en Acción, “isto non é máis do que unha tentativa desesperada da empresa de calarnos a través dunha acción xudicial contra a participación pública”. A situación foi posta en coñecemento da Relatora Especial das Nacións Unidas sobre a situación das persoas defensoras de dereitos humanos, Mary Lawlor.