BNG | nota de prensa

O BNG exixe á Xunta solucións para a crise industrial, na vez de acompañar axs traballadorxs ao paro ou á precarización

Mon Fernández recrimina ao Executivo Feixóo a perda de 12.000 empregos no sector e a súa incapacidade para achegar alternativas de futuro
O BNG exixe á Xunta solucións para a crise industrial, na vez de acompañar axs traballadorxs ao paro ou á precarización
Mon Fernández
Mon Fernández

Santiago de Compostela, 26 de xaneiro 2022.- O Bloque urxiu á Xunta no Parlamento galego solucións ante a grave crise industrial que padece o País, na vez de limitarse a desenvolver políticas que se reducen “a acompañar aos traballadores e traballadoras á porta de saída ou á precarización”. Así llo reclamou nunha interpelación en Pleno parlamentario o portavoz nacionalista de Economía e Industria, Mon Fernández, ao vicepresidente segundo e conselleiro do ramo, Francisco Conde, a quen recriminou que “a súa política deu como resultado 12.000 postos de traballo menos no sector industrial, precarización das condicións de traballo e desprotección medioambiental”.

“Unha política suicida”, resumiu, logo de repasar a crise que atravesa o sector ao longo da xeografía galega, dende A Mariña ata Vigo, con moitos máis empregos en risco en diferentes actividades, diferentes empresas e por causas tamén diferentes pero que, en todos os casos, comparten un común denominador, “a inutilidade do Goberno de Feixóo para resolver ningunha de todas estas crises”.

Logo de rexeitar os argumentos reiterados polo PP, sobre todo nos últimos tres anos, de que a responsabilidade é do Executivo estatal, cando Feixóo leva gobernando en Galiza case 13 anos -“a responsabilidade será, cando menos, compartida por PSOE e PP”, sentenciou-, Fernández pediu explicacións ao conselleiro polas medidas desenvolvidas ata o momento e as que ten previsto emprender para corrixir esta tendencia, “unha curva de perda de actividades industriais e empregos que xa dura case 13 anos e que parece que se vai prolongar durante algún máis se os gobernos non toman medidas urxentes”.

Nesta liña, exixiu respostas ante o feito de que a “mocidade galega estea condenada a elixir entre precariedade ou emigración”, ante a negativa da Xunta a rescatar grandes empresas industriais en crise ou ante a súa oposición a non contemplar nos orzamentos actuacións nas zonas máis afectadas pola transición enerxética.

Crises por todo o País: A Mariña, Ferrolterra, As Pontes, A Coruña, Vigo...

“Explíquenos por que o goberno de Feixóo leva 13 anos incumprindo as súa propia promesa electoral de impulsar unha grande área de reparacións navais en Ferrol; explíquenos por que o goberno galego rexeita vincular a autorización para instalar parques eólicos a que os promotores impulsen ou participen en proxectos industriais asociados; explíquenos por que o goberno galego rexeita impulsar a creación dunha empresa pública de enerxía que concentre todos os activos enerxéticos de Galiza para axudar ao impulso industrial e á transición enerxética; explíquenos por que o goberno galego consíntelle a Xeal o incumprimento dos termos das súas concesións hidroeléctricas ou por que deixou caer o naval de Vigo como se non fora con vostede. Explíquenos por que o goberno de Feixoo asume as posicións do presidente de  Stellantis, aínda que iso implique renunciar a que se instalen en Galiza fábricas de baterías ou de microchips, ou por que Galiza segue tan lonxe dos investimentos en I+D+i de outros países e territorios da nosa contorna”, cuestionou con severidade.

“Ten vostede moitas explicacións que dar, señor vicepresidente; máis de 12.000 postos de traballo perdidos nos contemplas e moitos máis en risco”, resumiu para a continuación instar ao Goberno do PP a concretar as medidas que ten previstas neste ámbito en comarcas como as da Mariña, As Pontes, Ferrol, A Coruña ou Vigo.

“Porque estase a consolidar a opinión de que ese ‘estar ao lado dos traballadores e traballadoras’ que vostede repite continuamente significa unicamente acompañalos á porta de saída”, incidiu, para exemplificar cos casos de Siemens-Gamesa, Vestas, Alu Ibérica ou Barreras, “nos que as alternativas empresariais que se manexan implican traspaso de activos sen máis garantías para o persoal”. A estes casos engadiu tamén o de Stellantis, principal empresa por emprego no sector industrial, e na que traballadores e traballadoras “levan varios anos en ERTE permanente”, mais tamén, e sobre todo, preocupados pola “continua precarización das súas condicións de traballo”.  

Neste contexto, o deputada nacionalista criticou que a gran medida do Executivo Feixóo sexa a de “eliminar burocracia”, o que cualificou de “eufemismo do PP” para agochar, ademais da súa falta de iniciativa e de proxecto para este País, “unha redución de prazos, entre outros, aqueles de exposición pública das avaliacións ambientais, mesmo en contra das directivas da UE, tal e como vén de afearlle o Tribunal Superior de Galiza”.

“Parece que a súa solución para todo é reducir garantías, sexa no ámbito laboral ou medioambiental, alimentando esa falta e perigosa dicotomía entre crecemento económico e condicións laborais, entre crecemento económico e medio ambiente”, resumiu. Logo de escoitar a intervención do vicepresidente segundo, Mon Fernández cualificou de “indignante o nivel de frivolidade e de demagoxia” empregado polo Goberno galego para falar dun problema tan grave para Galiza como é a perda de peso industrial e, neste sentido, considerou “máis grave e indignante aínda” por producirse nun contexto de crise xeral, de grandes incertezas, “no que o nivel de autoesixencia, de responsabilidade e de ansia dos gobernos debía ser o máximo”.

“Mais aquí está vostede, coma sempre, mantendo contra vento e marea un relato partidista e absolutamente pobre, absolutamente cativo, que en nada axuda a facer unha diagnose da situación cabal e razoable, a dar un debate construtivo, e que, por suposto, en nada axuda a construír e acertar cos proxectos e coas solucións”, reprochou, para a continuación recalcar que, de aí, “a incapacidade do PP e do Goberno de Feixóo para liderar o País, esa inutilidade manifesta para protexer os nosos sectores estratéxicos, para sacar partido das potencialidades de Galiza, da nosa posición da nosa posición xeo-estratéxica, dos nosos recursos enerxéticos, do noso capital humano, ou da nosa posición consolidada en sectores que historicamente aguantan mellor as crises e os ciclos económicos”.

“E ademais dimiten, renuncian a traballar por mellorar ou resolver aqueles problemas estruturais do país, como por exemplo o financiamento, na que o goberno de Feixóo prefire facer fronte común con outros territorios cos que non ten nada que ver, priorizando a obediencia ao presidente Casado e os intereses do PP, por enriba dos intereses de Galiza; e todo a cambio dun pouco de protagonismo mediático nos medios da corte madrileña”, concluíu.  

O BNG exixe á Xunta solucións para a crise industrial, na vez de acompañar axs traballadorxs ao paro ou á precarización