O punto de encontro será o emblemático Obelisco, ás 18:30 horas, onde se dará voz á indignación coa música do artista local Xosé Taboada e a súa banda Bule Bule. Ademais, contaremos coa participación do representante de Médicos do Mundo, Felipe Noya, quen subliñará as devastadoras consecuencias que estes ataques están a ter no sistema de saúde de Gaza.

O acto tamén será o momento para a lectura dun manifesto titulado "Ante o drama humanitario en Gaza, reclamamos o alto ao fogo inmediato", asinado por Amnistía Internacional e outras oito ONGs galegas. Neste documento, esixe unha pausa sostida no conflito para permitir a chegada de axuda humanitaria á Franxa e insta á comunidade internacional a non permanecer indiferente diante das violacións dos dereitos humanos.

As organizacións que apoian esta iniciativa son AGARESO, AIRE, Coordinadora Galega de ONGs para o Desenvolvemento, Fundación Educo, Médicos do Mundo, Miradas al Mundo, Movimento pola Paz e RSF - Reporteiros sen Fronteiras.

É un chamamento á solidariedade e á acción concreta para poñer fin á violencia e garantir un futuro de paz e dignidade para o pobo palestino. Non podemos permanecer alleos ao sufrimento e ás violacións dos dereitos humanos. Unamo-nos nesta causa xusta e urxente.

Manifesto

Ante o drama humanitario que se está a vivir na Franxa

de Gaza e o resto de Territorios Palestinos Ocupados,

reclamamos o alto ao fogo inmediato

A Coruña, 21 de marzo do 2024.

As seguintes organizacións asinamos este manifesto: AGARESO – Asociación Galega

de Comunicación para o Cambio Social, AIRE – Asociación Integral de Rescate en

Emergencias, Coordinadora Galega de ONGs para o Desenvolvemento, Fundación

Educo, Médicos del Mundo, Miradas al Mundo, Movimiento por la Paz, RSF -

Reporteros sin Fronteras e AIG - Amnistía Internacional Galicia.

O 7 de outubro do 2023 comezou unha escalada de violencia sen precedentes en Israel

e Territorios Palestinos Ocupados. Tras os ataques levados a cabo por Hamás, que se

saldaron coa vida de máis de 1.200 israelís e a toma de reféns, Israel está cometendo

na súa resposta en Gaza unha das maiores atrocidades que teñamos visto xamais.

Israel causou a morte de máis de 30.000 persoas ata o momento, sendo case a

metade nenos e nenas, ademais dun espantoso número de feridos. Os ataques

sobre o norte da Franxa de Gaza, illada de feito do resto de Gaza, provocaron o

desprazamento forzoso de máis de 2 millóns de palestinos, dunha poboación total

de 2,2 millóns. Aínda sen ter en conta que que forzar aos residentes a abandonar os

seus fogares pode ser constitutivo de crime de guerra, a extensión da Franxa e a súa

densidade de poboación fan que non haxa refuxio seguro en Gaza fronte aos

bombardeos indiscriminados de Israel. A poboación gazatí non pode fuxir a ningures.

A situación humanitaria en Gaza é hoxe terrible. Bloqueada ilegalmente por Israel dende

2007, e ocupada ilegalmente dende 1967, a Franxa foi definida como inhabitable

pola ONU, cuxo Secretario Xeral a chegou a definir como o inferno na terra e o

cárcere a ceo aberto máis grande do mundo. A esta situación engádeselle que, nos

últimos meses, Israel cortou subministracións básicas, incluíndo internet e electricidade,

o que deixou aos hospitais ao bordo do colapso ou directamente inutilizados. Iso no

mellor dos casos, xa que no peor os hospitais e os seus arredores son bombardeados.

O limitado goteo de subministracións que chegan a Gaza fano, principalmente, a través

do paso fronteirizo de Rafah, na fronteira con Exipto. Existen outros puntos de acceso

e pasos fronteirizos. Israel pechou algúns deles despois do 7 de outubro, outros

permanecen pechados dende hai anos. Israel exerce un control estrito sobre todo o que

entra e sae de Gaza como parte do seu bloqueo ilegal, incluídas persoas e mercadorías.

Unha resolución do Consello de Seguridade da ONU aprobada en decembro do

2023 esixe que as partes permitan o uso de todas as rutas dispoñibles para

garantir que a asistencia vital chega á poboación civil. A pesar desta resolución

xuridicamente vinculante, Israel negouse a abrir máis pasos fronteirizos. Ben ao

contrario, a inminente ameaza dun asalto terrestre a gran escala contra Rafah, onde

actualmente se refuxian máis de 1,2 millóns de persoas, tería consecuencias

devastadoras para a situación humanitaria.

O pasado 26 de xaneiro, a Corte Internacional de Xustiza ordenou a adopción de

medidas inmediatas e efectivas para protexer á poboación palestina na Franxa de

Gaza do risco de xenocidio asegurando a suficiente asistencia humanitaria e

permitindo servizos básicos. Nunha mostra inequívoca de desprezo a esta sentenza,

Israel segue a incumprir a súa obriga de garantir a chegada en medida suficiente

duns bens e servizos que poden salvar vidas. A magnitude e gravidade da catástrofe

humanitaria causada polos incesantes bombardeos, a destrución e o asfixiante asedio

poñen a máis de dous millóns de persoas palestinas en risco de sufrir danos

irreparables.

Antes do 7 de outubro entraban cada día en Gaza unha media de 500 camións que

transportaban axuda e artigos comerciais, como alimentos, auga ou subministracións

médicas. Se ben esta cantidade era insuficiente para satisfacer as necesidades da

poboación, nas últimas semanas o número de camións diminuíu drasticamente e os

lanzamentos aéreos non poden proporcionar os volumes de axuda que se transportan

por terra.

A magnitude e gravidade da catástrofe humanitaria causada polos incesantes

bombardeos, a destrución e o asfixiante asedio poñen a máis de dous millóns de

persoas palestinas en risco de sufrir danos irreparables. As familias levan meses

bebendo auga contaminada e pasan días sen comer. O sistema de saúde afundiuse por

completo no medio de brotes de enfermidade e lesións graves causadas polos

bombardeos. A mediados de febreiro, organismos humanitarios informaron dun

alarmante incremento da desnutrición aguda entre a poboación e, recentemente,

polo menos 20 nenos e nenas morreron por desnutrición severa, deshidratación

e enfermidades relacionadas con elas. A poboación da Franxa leva meses

sobrevivindo cunha fame que acada o nivel de crise, na proporción máis grande de

poboación en situación de crise de seguridade alimentaria xamais rexistrada pola

Clasificación Integrada das Fases da Seguridade Alimentaria (CIF). A ONU xa advertiu

de que a situación de gran fame é inminente.

Tamén é imprescindible que se poña fin aos ataques ilexítimos, incluídos os ataques

indiscriminados, os ataques directos contra persoas e bens civís e os ataques

desproporcionados, entre eles os dirixidos a medios de comunicación e xornalistas.

Israel debe permitir de inmediato a entrega sen trabas de axuda humanitaria á

poboación civil da Franxa de Gaza ocupada, levantar o bloqueo ilegal que exerce sobre

Gaza dende hai 16 anos e liberar a todas as persoas palestinas que están detidas

arbitrariamente ou en situación de desaparición forzosa, como os xornalistas Nidal al

Waheidi e Haitham Abdelwahed.

A maior parte das democracias occidentais e as principais institucións europeas

manteñen que Israel ten o dereito e o deber de defender a súa seguridade en

cumprimento co Dereito Internacional Humanitario. Pero ao facelo, están obviando que

Israel, como potencia ocupante, atópase vencellada polo IV Convenio de Xenebra,

que lle obriga a protexer á poboación palestina dos territorios que militarmente

ocupa. Israel leva décadas incumprindo esa obriga, ademais de vulnerar o Dereito

Internacional Humanitario, o Dereito Internacional dos Dereitos Humanos, e o

ordenamento xurídico internacional en xeral, ocupando militar e ilegalmente os

territorios palestinos como parte dun crime máis amplo de lesa humanidade de

Apartheid.

Ante o desastre humanitario sen precedentes en Gaza, dende Amnistía Internacional

reclamamos un alto ao fogo sostido e prolongado de todas as partes,

indispensable para que as axencias de axuda humanitaria poidan facer chegar a

axuda suficiente á Franxa e a distribúan de forma segura e sen condicións. O alto

ao fogo tamén é a maneira máis eficaz de protexer á poboación civil mentres as partes

belixerantes seguen cometendo violacións graves dos dereitos humanos.

Non podemos esquecer que esta crise ten lugar no contexto da ocupación militar máis

prolongada do mundo e do sistema de Apartheid de Israel sobre a poboación palestina.

A protección que ofrece o cese das hostilidades nesta situación é necesaria e urxente.

Tamén é imprescindible que se poña fin aos ataques ilexítimos, incluídos os ataques

indiscriminados, os ataques directos contra persoas e bens civís e os ataques

desproporcionados.

Israel debe permitir de inmediato a entrega sen trabas de axuda humanitaria á

poboación civil da Franxa de Gaza ocupada, levantar o bloqueo ilegal que exerce sobre

Gaza dende hai 16 anos e liberar a todas as persoas palestinas que están detidas

arbitrariamente.

Hamás e todos os demais grupos armados deben pór en liberdade inmediata e

incondicional a todos os reféns civís e tratar con humanidade a quen permanece en

cativerio até que se lles poña en liberdade.

A comunidade internacional non pode mirar cara outro lado. É imprescindible que

se impoña un embargo integral de armas a todas as partes no conflito, tendo en

conta que se están a cometer graves violacións dos dereitos humanos que

constitúen crimes do dereito internacional.

A sentenza da Corte Internacional de Xustiza debe ser cumprida e instamos a

todos os Gobernos a actuar para prever o xenocidio, e a apoiar inequívoca e

incondicionalmente todos os mecanismos de rendición de contas existentes a nivel

internacional.

Tamén lle pedimos aos Gobernos que garantan a financiación adecuada á Axencia

da ONU para a Poboación Refuxiada Palestina (UNRWA). A UNRWA é dende hai

tempo a única táboa de salvación para a poboación refuxiada palestina en Gaza e

noutros lugares de Oriente Medio, proporcionando axuda humanitaria, refuxio e

educación.

Os Estados teñen a responsabilidade legal e moral de protexer á poboación civil, impedir

os crimes de guerra e facer cumprir o dereito internacional. Por iso instamos a todos os

Estados a que teñan en conta que a súa inacción ou a continuidade do seu apoio,

ademais de agravar a traxedia, tamén os implica nela. Pedímoslles que fagan todo o

que estea na súa man para evitar novas ofensivas militares e conseguir un alto ao fogo

permanente e integral en Gaza.

Asinan,

• AGARESO – Asociación Galega de Comunicación para o Cambio Social
• AIRE – Asociación Integral de Rescate en Emergencias
• Coordinadora Galega de ONGs para o Desenvolvemento
• Fundación Educo
• Médicos del Mundo
• Miradas al Mundo
• Movimiento por la Paz
• RSF - Reporteros sin Fronteras
• AIG - Amnistía Internacional Galicia