A CORUÑA – 4 de marzo de 2026

A imaxe de A Coruña degrádase por momentos. Esa é a denuncia que o Movemento Sumar Coruña puxo hoxe sobre a mesa, alertando dunha situación de deterioro que xa non se limita a puntos concretos, senón que afecta ao tecido mesmo da cidade: desde o pavimento das grandes avenidas ata a seguridade dos centros onde estudan os máis novos.

Unha cidade chea de "buratos"

A situación das infraestruturas urbanas é, para a formación, insostible. Sumar Coruña puxo o foco en exemplos rechamantes como o estado da Domus, o abandono da Casa Carré ou os problemas de asfaltado que sofren vías fundamentais.

"Non hai rúa que non teña unha fochanca. A sensación de abandono esténdese por todos os barrios", denuncian desde a formación.

Entre os puntos críticos sinalados destacan:

• As fochancas no acceso á Avenida de Alfonso Molina.
• O mal estado do firme na rúa Juan XXIII.
• O afundimento rexistrado en Francisco Pérez Carballo.

A voceira de Movemento Sumar Coruña, Trinidad Palacios, foi tallante ao valorar a xestión municipal: "As rúas reflicten ao goberno local: parches e non solucións". Palacios criticou o desequilibrio nos investimentos, sinalando que mentres se destinan 8 millóns de euros ao Parrote, o resto dos barrios acumulan fochancas e falta de mantemento.

A crise nos centros educativos

Pero o deterioro non se queda na rúa. Sumar Coruña tamén sinalou a responsabilidade da Xunta de Galicia ante as recentes mobilizacións de familias e comunidades educativas. Os problemas estruturais en varios colexios da cidade evidencian, segundo Palacios, unha falta de compromiso coa educación pública.

"É unha vergoña que no ano 2026 haxa centros públicos con deficiencias estruturais mentres a Xunta mira para outro lado", afirmou a voceira. "Non se pode presumir de excelencia educativa cando nin sequera se garante o mantemento básico. A Xunta fallalle ás familias e iso é inadmisible".

Exixencia de plans integrais

Ante este escenario, o Movemento Sumar Coruña reclama que tanto o Concello como a Xunta abandonen a estratexia de "botar balóns fóra". A formación solicita a posta en marcha de plans integrais, públicos e calendarizados que conten con recursos suficientes e prazos de execución concretos.

"A política de parches e de escusas ten que rematar. A Coruña merece administracións que asuman as súas responsabilidades", concluíu Palacios.