O Concello da Coruña, a través da Concellería de Benestar Social, Participación e Igualdade e o Centro de Información ás Mulleres (CIM), continúa impulsando o programa "Coruña Orgullosa · Celebrando a Diversidade”. Co gallo do mes do Orgullo, a cidade herculina converterase nun espazo de debate, aprendizaxe e reflexión grazas a dúas conversas abertas ao público xeral que terán lugar no emblemático Kiosco Alfonso durante o mes de xuño.

Estas citas buscan derrubar mitos, cuestionar os límites establecidos e construír novos imaxinarios arredor da diversidade corporal e de xénero.

Mer Gómez porá "o punto sobre o i" da intersexualidade

A primeira das citas terá lugar o xoves 11 de xuño, de 19:30 a 21:00 horas. Baixo o título «Poñer o punto sobre o i», o Kiosco Alfonso acollerá a Mer Gómez, recoñecida activista intersex, escritora, divulgadora e doutora en Estudos Feministas e de Xénero.

Este encontro configurarase como unha actividade formativa e participativa deseñada para responder a preguntas esenciais que moitas veces fican á marxe do debate público: Que son as intersexualidades? Que lugar ocupa a “i” nas siglas LGTBI? Por que seguimos sabendo tan pouco sobre a diversidade dos corpos?

A través da súa intervención, Gómez proporá ampliar a mirada, cuestionar o binarismo médico e social, e resolver dúbidas co obxectivo de desmontar mitos e defender os dereitos das persoas intersex.

Patricia Campos convida a "voar" en liberdade

A segunda conversa, titulada «Voa comigo», celebrarase o mércores 17 de xuño, de 19:00 a 20:30 horas. A protagonista desta xornada será Patricia Campos Doménech, que fixo historia ao converterse na primeira muller pilota de reactor e helicóptero da Armada Española. Ademais da súa faceta militar, Campos é adestradora de fútbol, comunicadora, escritora e unha activa defensora dos dereitos LGTBI.

Neste encontro, compartirá a súa intensa traxectoria persoal e profesional. Un relato de valentía, superación e liberdade que servirá de base para reflexionar sobre os límites e as barreiras que impón a sociedade, a importancia de perseguir os propios soños e a necesidade de abrir camiño para as vindeiras xeracións.

Información de interese e inscricións Ambas as dúas actividades son gratuítas e dirixidas ao público en xeral. Porén, debido a que as prazas son limitadas, o acceso realizarase por rigorosa orde de inscrición. As persoas interesadas en asistir a calquera dos dous encontros deben tramitar a súa reserva a través do seguinte formulario web: Inscrición de balde aquí.