Na Casa das Asociacións en Santiago de Compostela celebrouse este martes, 27 de xuño, o peche dos tres anos do proxecto #OlympeEmprende, unha iniciativa que formou e apoiou a mulleres emprendedoras no ámbito da economía social e solidaria en Galicia.

Este proxecto innovador e de empoderamento feminino estivo promovido polas cooperativas Tandem Social, Abeluria e Wazo Coop.

A Celebración do Emprendemento Feminino

O acto de clausura do programa contou con actividades variadas, entre elas un almorzo networking, unha mesa redonda sobre o ecosistema emprendedor da economía social, e unha dinámica de enraizamento.

Un dos puntos culminantes foi a entrega de premios e diplomas, que recoñeceron o esforzo e a innovación das mulleres emprendedoras de Galicia.

O xurado desta terceira edición, conformado por Carme Casado, responsable de Desenvolvemento Económico, Oficina de Promoción Económica do Concello de Santiago de Compostela; Eva López Barrio, responsable do Programa Woman Emprende da Universidade de Santiago de Compostela (USC) e Belén Liste Lázara, Subdirectora Xeral de Emprego da Xunta de Galicia; destacou a madurez dos proxectos presentados e o alto nivel das propostas.

O primeiro premio, cunha dotación de 1.200€, recaeu na cooperativa Outrora, formada por emprendedoras de A Guarda (Pontevedra) e adicada á realización de actividades, programas e proxectos no ámbito socioeducativo en áreas de igualdade, dinamización comunitaria e lecer; e o segundo premio, cunha dotación de 1.000€, foi para o proxecto Coidadoras no Rural de Barro (Pontevedra) centrado no acompañamento e prestación de servizos a persoas maiores e/ou dependentes. Os 800€ do terceiro premio recaeron en Beauty Detox Concept S. Coop. Galega (Potingues Verdes), unha tenda en liña de cosmética ecolóxica.

Ao peche do proxecto asistiron a subdirectora de Economía Social da Xunta de Galicia, Farrah Lisa Meghazi; e a Concelleira de Dereitos e Servizos Sociais, Promoción Económica e Xuventude do Concello de Santiago, María Rozas Pérez.

O Legado de #OlympeEmprende

Durante tres edicións, o programa proporcionou a 50 mulleres en Galicia unha formación completa e innovadora, sesións de intercooperación, tours de emprendemento, webinars e acompañamento estratéxico, territorial e de competencias para impulsar ideas de negocio con impacto na comunidade. En total, impartíronse 280 horas de formación e 84 de acompañamento.

Alén dos datos cuantitativos, o legado do #OlympeEmprende é a creación de moitas redes e complicidades entre proxectos liderados por mulleres dentro da economía social galega.

"Na cooperativa, a forza non está na separación, senón na conexión. Emprender no feminino en Galicia significa tecer redes, compartir coñecementos e recursos, e contribuír ao desenvolvemento da nosa comunidade. O futuro da economía é social, solidario e feminino.", explicou Ana Olveira, socia da cooperativa Abeluria, unha das impulsoras do proxecto.

"Cooperativismo e feminismo son dous movementos que se nutren mutuamente. Mulleres emprendedoras galegas están a liderar o camiño cara a unha economía máis inclusiva e sustentable. En Abeluria, estamos orgullosas de apoiar esta visión a través de proxectos como #OlympeEmprende", recalcou Olveira na mesa redonda 'Conversa co ecosistema emprendedor da economía social: Retos e desexos das mulleres emprendedoras galegas'

Compromiso co Emprendemento Feminino e a Economía Social

Para rematar, queremos citar a Olympe de Gouges, unha revolucionaria que defendeu a igualdade entre o home e a muller en todos os aspectos da vida pública e privada. Ela redactou a Declaración dos Dereitos da Muller e a Cidadá en 1791, e o programa #OlympeEmprende pretende honrar a súa memoria e comprometerse coa igualdade, fomentando a creación de novas cooperativas lideradas por mulleres que impulsan a transformación.

#OlympeEmprende forma parte da convocatoria #POISES, promovida por CEPES actúa como Organismo Intermedio del Programa Operativo Empleo, Formación y Educación (POEFE) do Fondo Social Europeo (FSE). Todas as accións son gratuítas e cofinanciadas polo FSE para conseguir formación e emprego de calidade.