A Coruña, 10 de setembro de 2025 – A asociación convida a todos os veciños e cidadáns a participar na palestra “Luísa Viqueira: unha historia de dignidade para contar”, que terá lugar este xoves 11 de setembro ás 20 h no local veciñal da Rúa Entrepenas, número 38. A entrada será libre e de balde, ofrecendo a oportunidade de coñecer de primeira man a traxectoria vital desta coruñesa exemplar.

A palestra será impartida por Manuel Miragaia Doldán, escritor e exprofesor, que é ademais socio e colaborador habitual da Asociación AGRA. Miragaia, autor do artigo “Luísa Viqueira: exemplo de activismo antifascista, democrático e cultural” publicado na revista da Fundación Terra e Tempo, afondará na loita incansable de Viqueira Landa durante a contenda e o seu compromiso como activista no exilio mexicano.

A figura de Luísa Viqueira Landa representa un testemuño vivo do activismo antifascista e da resistencia cultural e democrática. A súa dedicación na Guerra Civil e a súa posterior vida de compromiso fóra das nosas fronteiras demostran a fortaleza de moitas mulleres que, dende o anonimato ou o esquecemento, mantiveron vivo o ideal de liberdade. Esta palestra preséntase como un espazo de reflexión e recoñecemento a todas elas.