A CORUÑA | 23 de febreiro de 2026

No día en que se cumpren 189 anos do nacemento de Rosalía de Castro, a memoria da nosa poeta nacional volve ao primeiro plano da política coruñesa. O BNG aproveitou esta efeméride para denunciar o "incumprimento" por parte do Executivo municipal dunha débeda histórica coa figura da autora: a recuperación da vivenda na que morou durante a súa estancia na cidade herculina.

Unha moción con cinco anos de espera

A concelleira nacionalista Mercedes Queixas lembrou este luns que xa en decembro de 2021 o Pleno aprobou, por unanimidade e a instancias do BNG, unha moción que instaba o Goberno local a iniciar conversas con Abanca, actual propietaria do inmoble. O obxectivo era acadar a cesión da casa para a súa posterior rehabilitación e musealización.

Con todo, case un lustro despois daquel acordo, o proxecto permanece paralizado. "Case cinco anos despois do acordo do Pleno, volvemos esixirlle ao Goberno de Inés Rey que o materialice e que traballe para contribuír a ensanchar a memoria viva dunha galega universal", sinalou Queixas.

A Coruña como cidade rosaliana

Desde o BNG reivindican o vencello vital e literario de Rosalía coa cidade, onde residiu entre os anos 1871 e 1874. A formación critica a "indiferenza" do Goberno Local perante este aniversario e subliña que o recoñecemento á poeta non debe quedar en actos simbólicos, senón en feitos concretos que protexan o seu legado arquitectónico.

"A Coruña tamén é Rosalía e por iso desde o BNG lembramos con orgullo o moito que a nosa autora gostaba da cidade e da moita pegada que deixou na súa vida e tamén na súa obra", afirmou a concelleira.

Para os nacionalistas, a transformación desta propiedade nun espazo cultural é un paso imprescindible para que A Coruña asuma con todas as consecuencias a súa condición de "cidade rosaliana", un orgullo que, din, debe ir acompañado da xestión necesaria para recuperar o patrimonio que lle pertence ao pobo.