A Xunta destina 710 M€ á Coruña en 2026: Rueda inviste "máis do triplo do aumento autonómico" fronte á "parálise" de Rey e Sánchez
O Grupo municipal Popular da Coruña, encabezado polo seu voceiro Miguel Lorenzo e arroupado polos parlamentarios Gonzalo Trenor, Roberto Rodríguez e Belén do Campo, destacou hoxe o "compromiso histórico" do presidente da Xunta, Alfonso Rueda, coa cidade, tal e como reflicten os Orzamentos Autonómicos de 2026. A inversión total proxectada para A Coruña ascende a 710 millóns de euros, o que supón un incremento de 48 M€ respecto ao ano anterior.
A Xunta destina 710 M€ á Coruña en 2026: Rueda inviste "máis do triplo do aumento autonómico" fronte á "parálise" de Rey e Sánchez
foto 2 PRESUPUESTOS XUNTA 20-10-25
A Coruña, 20 de outubro de 2025.- Este aumento do 6,8% é, segundo Lorenzo, "máis do triplo do que aumentan os orzamentos autonómicos globais (2%)", demostrando a prioridade que a Xunta lle dá á cidade herculina. O voceiro popular subliñou que estes investimentos se dirixen a mellorar a calidade de vida dos coruñeses en áreas clave como sanidade, vivenda, benestar social, emprego, educación e transporte, contrastando coa que considera "parálise" dos gobernos local e estatal.
Sanidade e Vivenda: os eixos prioritarios
O Partido Popular fixo especial fincapé nos 65 millóns de euros dedicados conxuntamente a sanidade e vivenda, dous eixos que consideran "fundamentais" para a cidadanía.
En materia de Sanidade, destinaranse 50 M€. A maior partida, 43,7 M€, irá para continuar coas obras do Novo CHUAC, para cuxa fase II se prevé a licitación no primeiro semestre do vindeiro ano. O Novo Hospital conta ademais con partidas plurianuais por un importe global de 402 M€.
Así mesmo, os orzamentos inclúen 4,4 M€ para o tan demandado Centro de Saúde de Santa Lucía, e 1,7 M€ para novos equipamentos. "A Inés Rey moléstalle que a Xunta invista en sanidade, pero os coruñeses poden estar tranquilos: as obras do Novo CHUAC avanzan e haberá centro de saúde en Santa Lucía a pesar das demoras municipais", afirmou o voceiro.
No eido da Vivenda, a Xunta investirá 15 M€. Desta cifra, 13,2 M€ serán para construír vivenda pública en Xuxán (onde hai 104 pisos en construción) e noutras zonas da cidade (con 99 máis proxectados). Ademais, 1,34 M€ irán destinados ao desenvolvemento de solo en Monte Mero, onde se prevén máis de catro mil vivendas, das cales o 80% serán protexidas.
"A Xunta é a única administración que inviste en vivenda na nosa cidade", recalcou Lorenzo, criticando a falta de información sobre as vivendas da SAREB prometidas polo Goberno do Estado e o Concello, e cualificando medidas como a "zona tensionada" de "populistas" e contraproducentes para solucionar o problema.
Críticas á xestión local e estatal
Miguel Lorenzo aproveitou a presentación para contrastar a xestión autonómica coa de Pedro Sánchez e Inés Rey. O voceiro popular louvou o modelo de Rueda, que "rebaixa impostos, orzamenta inversións millonarias para A Coruña e as executa", poñendo como exemplo a nova Estación de Autobuses, que estará lista "antes de finalizar este ano".
Fronte a isto, criticou duramente o Goberno do Estado por "ignorar" á cidade e "atrasar todos os seus anuncios por falta de orzamentos", lembrando que o último orzamento aprobado foi en 2022. En canto á xestión municipal, Lorenzo censurou que o goberno de Inés Rey "non inviste nos barrios –máis de 300 M€ desde que goberna– e o pouco que fai é tarde, mal e sen consensuar".
Os populares destacaron que os orzamentos autonómicos de 2026 destinan 3 de cada 4 euros a sanidade, educación e política social, promovendo ademais políticas de emprego e mantendo as baixas de impostos que "supoñen un importante aforro para os galegos e os coruñeses", en contraposición coas "subidas de taxas" dos gobernos central e municipal.
