A Coruña, 7 de xullo de 2025.- O Atlantic Pride continúa a súa exitosa andaina na Praza de Pontevedra cunha prometedora terceira xornada. Este martes, 8 de xullo, a partir das 20:00 horas e ata a medianoite, o festival acollerá as actuacións de dúas das bandas galegas máis esperadas: Agoraphobia e Rivadulla, xunto coa animación musical de DJ Licho.

A noite comezará ás 20:00 horas con DJ Licho, quen quentará o ambiente cos seus enérxicos remixes de grandes divas do pop contemporáneo. Ás 21:00 horas, será a quenda de Rivadulla. Este artista coruñés, orixinario de Monte Alto, presentará as súas cancións "sentimentais, pero cargadas de rabia existencial", nunha mestura innovadora de pop dos 2000, electrónica con toques indie e trap, que el mesmo define como "parkineo marika". O seu primeiro disco, El menú, lanzado en 2024, aborda temas como o amor, o desamor, a autocompaixón e as rupturas.

Posteriormente, ás 22:30 horas, a Praza de Pontevedra vibrará co potente rock alternativo de Agoraphobia. A banda de Boiro, cunha traxectoria marcada por éxitos e galardóns como o Vodafone Yu Music Talent, regresou a comezos de ano co sinxelo Eyes Never Lie, o primeiro adianto do seu novo álbum. Esta canción, que o público do Atlantic Pride poderá gozar en directo, "captura a complexidade de volver a abrir o corazón despois de reconstruílo peza a peza", cun son cargado de intensidade e letras profundas que exploran o medo e o desexo de arriscar de novo. Agoraphobia, coñecida por xirar por diversos países e participar en grandes festivais, promete unha actuación cargada de enerxía e emoción.

A xornada pecharase novamente con DJ Licho, que desde as 23:30 horas continuará animando ao público coa mellor música de baile.

Un festival para todos os públicos

O Atlantic Pride, impulsado pola Asociación Orgullo Coruña -ORCO-, co patrocinio institucional do Concello da Coruña e o apoio da Deputación da Coruña, ademais do patrocinio privado de Estrella Galicia, Coruña The Style Outlets e Globalgrafic, celebra a súa sexta edición consolidándose como un referente da reivindicación da liberdade afectiva, sexual e de identidade. Coñecido como o 'Orgullo do Norte', o festival busca situar A Coruña como a capital do bo ambiente e a celebración sen distincións, ofrecendo unha contorna segura e amigable para todas as capas da sociedade.

Ao longo desta edición 2025, que se estende do 6 ao 13 de xullo, o Atlantic Pride contará cunha variada programación que inclúe concertos de inspiración eurovisiva, grandes nomes do pop galego, nacional e internacional, actuacións de drags e pinchadas de DJs. Entre os artistas xa confirmados atópanse divas do pop español como Judeline, Edurne, Nia, Merche e Paula Koops, xunto a talentos galegos emerxentes como De Ninghures, Coolnenas, Agoraphobia, Alana, LERIA, ELBA e o propio Rivadulla.

Ademais, o festival acollerá a iconas da cultura e a música LGTBIQ+ como Jimena Amarillo, Mayo e os DJs Sofía Cristo e Cascales, así como un elenco de drag queens sen precedentes, con nomes como Samantha Ballentines, Arantxa Castilla-La Mancha & OnyX Unleashed, e moitas máis. A clausura do Atlantic Pride promete un auténtico revival eurovisivo coas voces de David Civera, Anabel Conde e Kuve. En paralelo, o IV Certame Literario de Literatura LGTBIQ+, da man do Club de Lectura QUEERuña, continúa coa súa convocatoria aberta ata o 31 de maio.

O Atlantic Pride 2025 promete ser, un ano máis, un espazo de celebración aberto, seguro e diverso, consolidándose como unha das citas imprescindibles do verán no noroeste peninsular.