“Os pobos europeos pola paz” mobilízanse na Coruña o 9 de maio
O 9 de maio, coincidindo co 80 aniversario do final da Segunda Guerra Mundial, a plataforma A Coruña pola Paz convoca unha concentración cidadá ás 20:00h na praza de Pontevedra, sumándose ao chamado do European Peace Project, unha mobilización internacional descentralizada en defensa da paz en Europa.
“Os pobos europeos pola paz” mobilízanse na Coruña o 9 de maio
Cartaz 9 de maio
Baixo o lema “Os pobos europeos pola paz”, a convocatoria apela á conciencia cidadá para reclamar o cesamento das guerras, o freo ao gasto militar e o compromiso firme coa resolución pacífica dos conflitos e coa inversión social.
O acto será tamén unha homenaxe ás vítimas da guerra, do odio e da indiferencia en todo o mundo. A apertura correrá a cargo da bailarina Concha Pita Conde, que ofrecerá a súa peza “Danza pola Paz”.
A Coruña Pola Paz chama a asistir vestidas e vestidos de branco ou levando bandeiras brancas como símbolo universal da paz. Convida tamén a traer unha flor para ofrecer colectivamente durante o acto.
O manifesto que se lerá, proposto polo European Peace Project, denuncia a deriva militarista da Unión Europea e reclama recuperar o espírito orixinal do proxecto europeo como espazo de cooperación e convivencia entre pobos. Afirmando a fraternidade entre a cidadanía europea, condena a escalada bélica e reivindica a participación social como única vía para construír unha Europa de paz.
Sobre A Coruña pola Paz
A Coruña pola Paz (https://mundosenguerrascoruna.wordpress.com/2025/04/25/a-coruna-pola-paz/) é unha plataforma cidadá plural e aberta, formada por persoas e entidades que comparten un compromiso común: erguer a voz fronte á guerra e ao militarismo, promover a paz mundial e defender unha Europa baseada na nonviolencia, a xustiza social e a solidariedade entre pobos.
A iniciativa naceu en abril de 2025 como resposta local á convocatoria europea do European Peace Project, promovendo a implicación da sociedade coruñesa nun clamor continental pola paz.
Entidades integrantes de A Coruña Pola Paz:
Asociación Veciñal As Xunqueiras - Mesoiro - Vío
Asociación Veciñal Lonzas, Avenida del Ferrocarril, San Cristóbal das Viñas
Asociación Veciñal Feáns “O Freixo”
Asociación Veciñal Monte Martelo
Asociación Veciñal San Cristóbal das Viñas Os Anxos
Asociación Veciñal San Cristovo das Viñas
Asociación Veciñal e Cultural Oza Gaiteira Os Castros
