Tres noites de teatro ao aire libre

A programación desta edición ofrece tres espectáculos ben diferentes, da man de compañías galegas que mesturan improvisación, monólogo e teatro documental:

Venres 4 de xullo – Épica y Vulgaris (Improversados)

Un show de improvisación teatral no que o público forma parte activa da creación. A compañía combina narración espontánea con música en directo para dar vida, no momento, a historias incribles, inesperadas e sempre distintas.

Sábado 5 de xullo – Novecento (Ancoraxe Teatro)

A historia do lendario pianista Novecento, que pasou toda a súa vida a bordo dun transatlántico sen chegar a pisar terra, narrada polo seu amigo Tim Tooney. Un espectáculo onde a música e a palabra se combinan para construír unha experiencia íntima, convidando a cada espectador a completar a historia coa súa propia imaxinación.

Domingo 6 de xullo – A Nai (Amorodio Teatro)

Unha proposta multidisciplinar que mestura teatro documento e autoficción cun toque de humor. A obra explora as vidas das irmás Touza —Lola, Julia e Amparo— e as súas accións para salvar centos de persoas durante o Holocausto, reflexionando sobre a capacidade de manter a humanidade en tempos de brutalidade. A memoria convértese aquí nunha ferramenta crítica para analizar o presente e construír o futuro.

O MIAT volve consolidarse como unha proposta cultural única no verán coruñés. Tras dous anos sen actividade (2023 e 2024), a mostra regresa cun formato compacto pero ambicioso, mantendo o espírito que a fixo nacer: facer do teatro unha festa accesible para todas as persoas, sen barreiras económicas nin espaciais.

As funcións non requiren reserva previa e contan cun aforo limitado por orde de chegada.