Esta terceira edición do festival cultural, organizado por Mundo Sen Guerras e Sen Violencia A Coruña, comezará ás 17:00 h cunha exposición de artes plásticas na que participarán as obras de 11 artistas. A partir das 18:00 h, o escenario do Ágora converterase nun espazo compartido onde a música será a linguaxe común.

Belém Tajes é cantante, música e compositora. Nada en Bos Aires, pero galega, cultiva un proxecto fondamente persoal que mestura tradición, pop, electrónica e outros sons contemporáneos, tecendo pontes entre a sonoridade latinoamericana e a galega, cunha proposta que bebe da terra e do mar para chegar á emoción.

 

Feral Booty preséntanse como mutantes dun futuro de merda que viaxan no tempo ata o presente para conseguir unha cabra, comerse todo o lixo e a merda e convertela en chan fértil. Un clásico apocalíptico do underground herculino, cun son entre o punk e o folk, disposto a revolcarte polo po.

 

Misuria é un quinteto que rende homenaxe á música tradicional norteamericana a través do blues, folk, swing, gospel e bluegrass, cunha proposta que xira arredor da voz de Alba Furacán, acompañada de instrumentos como as harmónicas, a táboa de lavar, o lap steel e os kazoos, nun espectáculo divertido, diferente e para todos os públicos.

 

Planète Sauvage, formado por Darío Pérez e Cecilia Burillo, propón unha viaxe sonora para quen queira fuxir do ruído constante e do cansazo, combinando guitarra eléctrica, piano, violoncelo, sintetizadores e voces nun espazo de refuxio creativo onde a música é unha experiencia sensorial que atravesa a pel ata o profundo.

O Nonviolencia Activa Fest volverá así converter o Centro Social Ágora nun punto de encontro para a música, a arte e a celebración colectiva o 14 de febreiro, cunha programación que aposta por reivindicar a nonviolencia, a paz e o amor como forza colectiva e transformadora, entendendo a cultura como ferramenta esencial para  a convivencia.