O 2 de outubro celébrase o Día Internacional da Nonviolencia, en honra ao nacemento de Mahatma Gandhi, referente mundial da loita pacífica pola liberdade e a xustiza. Desde 2019, ademais, o Concello da Coruña recoñeceu por unanimidade esa mesma data como Día da Nonviolencia Activa na Coruña, reafirmando o compromiso da cidade coa paz e co diálogo.

O percorrido da marcha conta cunha forte carga simbólica: a pomba de Picasso, símbolo universal da paz e da esperanza, será o punto de inicio, e a Torre de Hércules, faro milenario Patrimonio da Humanidade, será a meta, representando a guía e a luz que orientan o camiño da humanidade cara á convivencia e á dignidade.

Con este acto, a plataforma A Coruña Pola Paz quere reivindicar o fin das guerras e dos conflitos armados, denunciando especialmente o xenocidio en Gaza e a guerra en Ucraína, así como a escalada belicista en Europa, o negocio armamentista e a expansión da OTAN. Do mesmo xeito, esixe que os fondos públicos se invistan en sanidade, educación, vivenda e dereitos sociais e non en armas, e reclama o impulso dunha cultura de paz e nonviolencia desde as institucións, a educación e os medios de comunicación. A plataforma demanda tamén que o Estado español se adhira e ratifique o Tratado sobre a Prohibición das Armas Nucleares (TPAN).

A Coruña Pola Paz fai un chamamento á cidadanía para sumarse á Marcha e manifestar que “nin un euro máis para a guerra, todos os recursos para a vida”.