A Coruña, 19 de novembro de 2025.- Aínda que a lexislación vixente non distingue entre o tamaño das compañías na obrigación de dispoñer de protocolos de vixilancia e actuación fronte ao acoso, o certo é que son as Pemes as que van máis atrasadas no cumprimento desta normativa. Así o subliña Sandra García Lombardía, inspectora de Traballo e Seguridade Social e coordinadora de Igualdade en Galicia.

A especialista dirixirá esta tarde unha xornada formativa centrada no “Protocolo de Acoso e as novas medidas de protección LGTBI” no Colexio Oficial de Graduados Sociais da Coruña e Ourense. Un foro onde se poñerán sobre a mesa os datos que confirman este atraso no sector.

Alto nivel de incumprimento

“Para falar con datos, hai que sinalar que a ITSS realizou en 2024 un total de 700 actuacións, das que resultaron un total de 333 medidas sancionadoras e/ou correctoras. Iso representa un nivel de incumprimento do 47,5%”, apuntou García Lombardía. A pesar de todo, a inspectora cre que as pequenas e medianas empresas van avanzando, aínda que “máis lentamente do que nos gustaría, tal e como mostran as cifras”.

Desde o Colexio Oficial de Graduados Sociais (GGSS) da Coruña e Ourense insisten na urxencia de que as Pemes poñan fin a este atraso e incorporen de maneira regrada e efectiva estes protocolos, considerados esenciais para a igualdade e a prevención de riscos laborais no conxunto dos seus cadros de persoal.

Novas normas de protección

Durante a xornada, os graduados sociais poderán afondar nas normas vixentes en materia de prevención do acoso, que abarcan desde a Lei de Igualdade e a de garantía integral de liberdade sexual, ata a Lei de Prevención de Riscos Laborais e o Convenio 190 da OIT.

Púxose especial atención na Lei 4/2023, que garante a igualdade real e efectiva para as persoas trans e LGTBI. Esta norma obriga ás empresas de máis de 50 traballadores a contar cun conxunto planificado de medidas e recursos para alcanzar a igualdade real e efectiva para este colectivo, incluíndo un protocolo específico para a atención do acoso ou a violencia.

A norma, explica García Lombardía, tamén engade “numerosas cuestións que afectan á xestión de RRHH de calquera empresa, desde como abordar unha transición de xénero dunha persoa traballadora, uso de vestiarios e aseos, uniformidade, persoas non binarias…”.

O medo a denunciar, un obstáculo

A inspectora de Traballo tamén profundou nunha das principais barreiras para a erradicación do acoso: o medo da vítima a denunciar, o cal favorece que esta realidade, a miúdo coñecida nas contornas laborais, non emerxa.

"Non é só o medo ao despedimento, hai tamén medo por parte das mulleres a ser vistas como problemáticas por denunciar estas situacións, a non ser apoiadas ou tomadas en serio, a sufrir a indiferenza ou baleiro dos compañeiros/as de traballo que evitan 'implicarse' ou 'posicionarse', a non conseguir probar os feitos e que o acosador/a saia reforzado", detalla a coordinadora de Igualdade en Galicia.

Ademais, moitas traballadoras manifestan a súa pouca confianza en que a empresa estea realmente comprometida na erradicación destas condutas ou o descoñecemento da existencia dos protocolos por falta de difusión.

Por iso, a especialista recalca que a sensibilización social e laboral, xunto coa formación dos traballadores/as, son claves para que o medo non paralice a denuncia.

Sandra García lembrou que o Plan Estratéxico 2025/2027 da Inspección potencia as actuacións dirixidas a loitar contra o acoso, tanto na protección das vítimas como na fiscalización da implantación dos protocolos de prevención polas empresas.