Pontón esixe ao Goberno central o rescate da AP-9 e que non siga dándolle longas a Galiza
A portavoz nacional do BNG, Ana Pontón, defende que a anulación da concesión é "a medida máis xusta e máis económica" para poñer fin a unha peaxe ilegal, aproveitando a porta aberta pola Unión Europea.
Pontón esixe ao Goberno central o rescate da AP-9 e que non siga dándolle longas a Galiza
Ana Pontón hoxe no CHUAC da Coruña
SANTIAGO DE COMPOSTELA.- A portavoz nacional do Bloque Nacionalista Galego, Ana Pontón, fixo un chamamento público desde A Coruña para que o Goberno central poña fin ás "longas" e aproveite a oportunidade que ofrece a Unión Europea para rescatar a AP-9. Nunha comparecencia ante os medios, Pontón subliñou que é o momento de antepoñer os intereses de Galiza aos de Audasa e acabar cunhas peaxes que cualificou de "inxustiza" e "ilegalidade".
"É máis barato anular a concesión que seguir pagando as bonificacións"
A líder nacionalista foi contundente na súa mensaxe: "Xa está ben de que uns gobernos e outros, tanto do Partido Popular como do Partido Socialista, lle tomen o pelo aos galegos e ás galegas". Pontón instou ao executivo a "aproveitar a oportunidade" que brindan as institucións europeas para anular unha concesión que, segundo ela, "é ilegal".
Ademais, a portavoz do BNG defendeu que esta non é só unha medida de xustiza, senón tamén a opción máis económica. Citando un informe da Universidade da Coruña, Pontón asegurou que o rescate da autoestrada custaría menos de 1.000 millóns de euros, xa que a ilegalidade da concesión recoñecida pola UE elimina a obriga de pagar o lucro cesante a Audasa. "É máis barato anular a concesión que seguir pagando as bonificacións", reiterou, criticando que tanto o PP como o PSOE defendan os intereses da concesionaria por riba dos da cidadanía galega.
Pontón non entende por que o Goberno socialista se empeña en defender a prórroga "ilegal" concedida no seu día por José María Aznar. Advertiu que se o Goberno central recorre a sentenza comunitaria, só estará a dilatar a solución, cun precedente similar xa resolto en Italia.
Pontón esixe a Rueda que abandone o seu "negacionismo" sobre Palestina
Por outra banda, a portavoz do BNG manifestou a súa "enorme preocupación" pola "situación insostible" en Palestina. Cualificou a actuación de Israel de "xenocidio" e reprochou ao Goberno de Rueda que se negue a condenalo.
"Preguntámonos que máis ten que pasar para que o Goberno do Partido Popular en Galiza condene o xenocidio en Gaza?", cuestionou Pontón. Ademais, denunciou que o presidente da Xunta vete no Parlamento galego a condena da "violación dos dereitos humanos máis básicos".
O BNG levará ao próximo pleno unha iniciativa para que o Parlamento condene o xenocidio en Gaza e a líder nacionalista pediu a Rueda que "non boicotee" a declaración. "Queremos que Galiza se poña do lado da humanidade e da defensa dos dereitos humanos", concluíu.
